Salam ‘alaikom warahmatuhu
Saleum lon tuju mandum syedara
Pakiban haba disinan Teungku
Lon neuk jak saweu tajak proh cakra
Haba lon peutroh nibak rakan droe
Calon samlakoe muda balia
Bak mita judo bek le meulaloe
Jinoe neudeungoe ulon bicara
Lam Hadis Nabi kalheuh neupeugah
Tadeungo beu pah wahe syedara
Bak pileh judo bek salah kaprah
Bek dudoe teulah watee ka tuha
Na peut peukara bak pileh istri
Geukheun le Nabi yang that mulia
Pileh hai rakan beu hati-hati
Bek meutuka kri bek salah raba
Peukara yang phon tapileh istri
Rupa jih tari tamse purnama
Watee tapandang timbul birahi
Tanyoe suami sabe lam suka
Nyang keu dua wahe sam lakoe
Beuna bak binoe bacut hareuta
Hudep teuh aman han meurangkaboe
Han payah publoe luweu cuet tuha
Peukara keu lhee wahe rakan droe
Aneuk beu meusoe nyan sinyak dara
Tareh beu jeulah nasab ta tusoe
Bek aneuk bajoe ka tajak mita
Teuma yang keu peut rakan meutuwah
Peunteng sileupah yang nyoe peukara
Tadeungo beugot ta ingat beupah
Jinoe lon peugah yang that utama
Tamita judo hai calon ayah
Ileumee beupah nyang kong agama
Beuna jiteupue beutoi ngoen salah
Hana that sosah nibak tajaga
Miseu peurumoh ureung meutuwah
Pue nyang tapeugah jibantah hana
Uroe ngoen malam langkah han caprah
Karna maruwah cukop dijaga
Meunyoe ma sinoeng akhlak jih ceudah
Aman sileumpah lam rumoh tangga
Hate teuh teunang han sagai sosah
Sang nyum ya Allah, lagee syuruga
Meunan keuh rakan tapileh istri
Lam hadis Nabi meunan ceurita
Beuna tapeteh lagee kheun Nabi
Geutanyoe akhi hudep bahgia
Meuhan tapateh lagee kheun Nabi
Tapileh istri ban ban nyang hawa
Alamat hudep han meukri sakri
Dudoe hai akhi tanyoe binasa
‘Et nhan keuh mantong rakan meutuwah
Bek panyang leumpah lon peugah haba
Tuto ngoen narit kadang na salah
Lon lakee meu’ah meu ube raya
Kareuna ulon bangai sileumpah
Cit golom pantah bak peugah haba
Tapi haba nyoe teutap lon peugah
Nyak jeut faedah tanyoe bersama
Timphan saboh kom pasoe lam ji-ee
Di dalam teuntee si asoe kaya
Salam’alaikom ijin lon lakee
Wahe e guree lon neuk jak gisa
Jakarta, 10 Februari 2011